Na die NG Kerk Algemene Sinode-besluit rakende selfde geslag verhoudinge, het jongmense ‘n gespreksgeleentheid by ‘n gemeente bygewoon. Die doel daarvan was om gehoor te gee aan die emosies wat mense as gevolg van die besluit beleef het. Hulle het gekies om nie te preek of antwoorde of inligting deur te gee nie.

Daar is ‘n oop ruimte geskep waar mense met uiteenlopende standpunte hulle stories en ervaringe kon deel. Hulle het ervaar dat hulle te midde van diversiteit, mekaar kon omarm. Hulle getuig dat toe hulle saam nagmaal gebruik het, daar ‘n besondere ervaring van deernis met mekaar was.

Hier is hulle voorstel vir die verloop van ‘n ontmoeting oor ‘n moeilike onderwerp:

• Steek ‘n kers aan of gebruik simbole wat mense herinner aan die lewende, opgestane Christus se teenwoordigheid deur sy Gees.
• Lees ‘n teks waar Jesus empaties luister of mense omarm.
• Gee ‘n paar waardes vir die deel van stories (dit is nie ‘n geleentheid om ander te oortuig van jou standpunt nie, jy mag bloot jou eie ervaring deel).
• Laat mense in kleiner groepe hulle ervarings (positief of negatief) deel oor die onderwerp – fokus op waarderende, diep luister.
• Gee geleentheid vir stil gebed.
• Gebruik saam nagmaal.
• Sluit af met ‘n seën.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

‘n Gemeente vertel dat hulle die konsep van “speed dating” gebruik om jongmense te help om dieper gesprekke te hê, empatie in te oefen en beter na mekaar te luister. Hulle verduidelik dat jongmense vandag meer as ooit vantevore moet aanpas in ‘n vinnige en komplekse wêreld en dit laat baie van hulle eensaam, verward en angstig voel. 

Die “Speed Dating” speletjie gaan in dié geval nie oor romantiese verhoudings nie, maar die gemeente gebruik bloot die konsep daarvan om in ‘n beperkte tyd, mense mekaar te laat vrae vra om mekaar beter te leer ken. Dit help die deelnemers om na te dink oor hulle eie identiteit en verhoudings te bou. 

Hulle gee die volgende wenke:

• Maak dit pret en nie bedreigend
• Laat mense 2-2 gesels, maar wissel mense af
• Beperk die tyd sodat almal praat-kans kry
• Begin met ‘n lys maklike, oppervlakkige en feitelike vrae 
• As dit ‘n tweede keer gespeel word, of as die groep mekaar beter ken, kan ‘n lysie “dieper” vrae gegee word
• Hierdie konsep kan ook goed werk in groepsverband, waar elkeen om die beurt ‘n dobbelsteen gooi om te bepaal watter vraag hy/sy moet antwoord.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

‘n Gemeente het tydens die COVID-19 pandemie mense genooi om op die gemeente se heining ‘n lint vas te bind en daardeur te sê hoe hulle voel. Die verskillende kleure het aangedui hoe hulle voel. Rooi het aangedui dat hulle nood of angs ervaar, swart het hartseer en dood voorgestel, groen het hoop en groei aangedui en blou het vrede simboliseer.

Hulle gee die volgende wenke:

• Kies ʼn ruimte wat toeganklik is.
• Kommunikeer die naam van die muur en rede daarvoor.
• Noem dat enige persoon welkom is om deel te neem.
• Verduidelik die simboliek van die kleure (jy kan ook prente of simbole gebruik).
• Gee mense genoeg tyd en ruimte om dit anoniem te kan doen.
• Gee ‘n kontaknommer indien iemand opvolg, gebed of ondersteuning benodig.
• Hou die ruimte oop vir ‘n paar weke of geleenthede.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

#imagine is ‘n beweging in Suid-Afrika wat sedert 2014 tieners byeenbring van verskillende denominasies vir ‘n naweek byeenkoms in verskillende plekke in die land. Die fokus daarvan is om jongmense uit verskillende agtergronde ‘n ruimte te bied om saam Jesus te ontmoet en om vir hulle ‘n droom te gee dat hulle ‘n verskil kan maak. Tydens die Wes-Kaap byeenkoms is die musiek ook sedert 2019 intensioneel ingespan om diversiteit te vier en ‘n brug te bou tussen mense. Die musiek is saamgestel om verskillende kontekste (stad en platteland), verskillende tale (Engels, Afrikaans en isiXhosa) en verskillende style (klassiek en kontemporêr) te verteenwoordig.

Hulle gee die volgende wenke om diversiteit met musiek te verhoog:

• Deel die droom.
• Gebruik musiek en danse uit die jongmense se leefwêreld om die ys te breek.
• Gebruik klassieke en rock instrumente, en selfs ‘n koor.
• Sing in verskillende tale, maar moenie bloot liedere vertaal nie – sing eerder medleys van verskillende liedere wat bekend is vir elke groepering.
• Gebruik ook ouer / tradisionele liedere, maar sing dit op ‘n byderwetse manier.
• Stel die orkes só saam dat mense van verskillende rasse, geslagte en ouderdomme verteenwoordig word.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

‘n Makro stadsgemeente bring jong ouers en ouer mense bymekaar rondom die doop van babas. Die ouer egpare is mense wat reeds kinders grootgemaak het en bereid is om ‘n jonger egpaar, wie se eie ouers meestal ver weg woon, te mentor vir die eerste jaar van hulle kind se lewe. Hulle verbind hulle daartoe om elke maand bymekaar te kom om die jong ouers emosioneel en geestelik te ondersteun. Hulle stem ook in om verder beskikbaar te wees om raad of wysheid te deel of om af en toe die baba op te pas. Die gevolg is dat nuwe ouers ervaar dat hulle in ‘n oorgangstyd ondersteun word deur hierdie mentor verhoudings. Die ouer egpare getuig ook dat hierdie verhoudings hulle geloofservaring verdiep.

Praktiese wenke:  

• Deel die droom met vrywillige ouer ouers
• Vra watter jong ouers die behoefte aan mentors het
• Bring almal byeen by die doopkursus of ‘n spesiale geleentheid
• Verduidelik wat van beide partye verwag word
• Deel stories en getuienisse van wat gebeur in hierdie verhoudings

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

‘n Gemeente het koffie gesprekke begin met jongmense wat die behoefte gehad het om ‘n gemaklike ruimte te deel waar hulle kan gesels oor hulle geestesgesondheid. Die gemeente het ondersoek ingestel oor wat die behoeftes van jongmense in hulle omgewing is en ontdek daar is nie ‘n ruimte waar jongmense wat dieselfde uitdagings het ten opsigte van angs en depressie, eerlik en veilig kan gesels nie. Daarom het hulle Courageous Coffee begin deur ‘n fasiliteerder te bemagtig om die gesprek in te lei, heerlike koffie aan te bied en ‘n lokaal wat die jongmense hulle eie kon maak. 

Hulle gee die volgende wenke:

1. Stel ondersoek in oor die verskillende belangstellings van jongmense in jou omgewing en die behoeftes wat aangespreek kan word.
2. Stel die gemeente se hulpbronne beskikbaar hiervoor.
3. Nooi die jongmense om die ruimtes hulle eie te maak.
4. Ontwikkel waardes vir die byeenkoms.
5. Laat die jongmense die gesprek stuur.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

In ‘n Bolandse dorp is daar ‘n groep jong werkendes wat opgemerk het dat baie van hulle vriende en kollegas nie die erediens bywoon nie, maar tog ‘n behoefte het om God te ontmoet en meer bewustelik te lewe. Hulle is self betrokke by ‘n gemeente en het besef dat hulle ‘n geleentheid kan skep om hulle vriende en kollegas te help om ook ‘n geleentheid te hê waarin hulle God kan ontmoet in die eenvoud en rustigheid van die natuur.

Die dorp waarin hulle woon is omring deur berge en natuurskoon, en dit het hulle laat droom oor die moontlikheid om ‘n erediens op die berg te hou. Dit sou ‘n geleentheid bied vir mense wat nie meer tuiskom in tradisionele eredienste nie om hulle geloof te versterk, terwyl dit ook vir mense wat lief is vir die natuur ‘n gemeenskap kan skep.

Die groep vriende het hierdie idee gedeel met ander gemeentes en ‘n diverse groep mense saamgenooi vir die eerste “kerk op die berg” geleentheid. Een keer per maand stap hulle vroeg oggend berg uit en neem hulle ‘n oomblik wanneer hulle bo kom om in stilte die natuur te geniet en bewus te raak van God se teenwoordigheid. Een van die groeplede lei ook ‘n gesprek waar hulle gesels oor hoe God in hulle gemeenskap teenwoordig is en hoe hulle saam met Hom daar kan besig wees.

Die jongmense erken dat hulle besige lewenstyl soms lei tot die gebrek aan balans en die gevoel van leegheid. Die skoonheid van die natuur en die wegbreek van hulle normale ritmes gee vir hierdie jongmense die geleentheid om God opnuut te ervaar en te rus in sy teenwoordigheid. Die eenvoud daarvan bring weer balans en herstel. Hulle het ook telkens ‘n nuwe waardering vir die natuur en die belangrike rol wat dit kan speel in die versterking van hulle geloof.

Deur ‘n erediens op die berg te hou, skep hulle ‘n geleentheid vir mense om stadiger en meer intensioneel te leef, terwyl hulle God kan ontmoet in die natuur en gemeenskap met ander kan vind. Hierdie inisiatief het ‘n positiewe impak op die lewens van hierdie jongmense en die gemeenskap om hulle heen.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

Toe die Covid-19 pandemie die wêreld tot stilstand gebring het, en mense met grendeltyd vasgekeer was in hulle huise, het ‘n groep predikante besef dit is ‘n unieke geleentheid om vir jong families te help om God te midde van die onsekerheid te ontmoet. Hulle wou families ‘n hulpmiddel gee om ‘n nuwe geloofsgewoonte te kweek om huisgeloof ‘n daaglikse ritme te maak. Dit sou as ‘n ankerpunt kon dien in dié onstuimige tyd. In grendeltyd is die daaglikse ritmes van gesinne ook versteur en mense se pas was stadiger. Dit was dus die ideale tyd om ‘n nuwe, opbouende gewoonte aan te leer om hulle te help om mekaar te ondersteun en hulle geloof te versterk.

Die groep predikante het virtueel saamgekom en besluit om ‘n toepassing (app) te ontwikkel vir ouers met jong kinders om hulle te help om op ‘n eenvoudige manier saam Bybel te lees en te bid. Die hulpmiddel sou veral handig wees in ‘n tyd wat kerke gesluit is, maar ook daarna. Die app bevat ‘n daaglikse oordenking of podcast met ‘n storie, ‘n teksdeelte, gespreksvrae, ‘n gebedswenk en praktiese doen idees vir families, kinders en tieners. Dit kan gebruik word deur gesinne met verskillende ouderdom kinders om saam te wonder, te gesels, te bid en dinge saam te doen as ‘n intensionele gewoonte om hulle geloof te versterk en God te beleef. Hulle kan dit enige plek en tyd doen – selfs in die motor – en dit is toeganklik vir almal. 

Die gevolg is dat ‘n paar jaar later, die app steeds deur gesinne gebruik word. Hulle vertel dat dit vir hulle ‘n eenvoudige daaglikse ritme geword het om as gesin by God en die Bybel uit te kom. Omdat dit so eenvoudig is en binne 5-10 minute gedoen kan word, is dit ook ‘n maklike gewoonte om aan te leer en by te hou, al is gesinne se programme baie vol.

Jongmense is op soek na maniere om ‘n gesonde en sinvolle lewenstyl te handhaaf binne die gejaagde moderne lewe en die kerk van die toekoms kan die geleentheid aangryp om geloofsgewoontes te kweek om hulle hiermee te help. In tye van verandering bied hierdie gewoontes ‘n vashouplek aan God en sy groter storie.

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

‘n Voorstedelike gemeente het besef dat hulle eredienste slegs ‘n spesifieke tipe spiritualiteit aanspreek en dat daar ‘n behoefte is aan ‘n meer inklusiewe benadering. Hulle het besluit om ‘n nuwe erediens op proef te stel wat meer as een tipe spiritualiteit sal akkommodeer. Hulle het ook die fisiese spasie van die erediens en die inrigting daarvan verander sodat dit ‘n meer interaktiewe erediens kon wees, waar mense met ‘n verskeidenheid van spirituele behoeftes kon deelneem. Hierdie behoeftes sluit in die behoefte om te leer, die behoefte om iets te beleef en die behoefte om iets te doen.

Die “Kryte en Kerse erediens” is gebore en het gepoog om mense van alle generasies bymekaar te bring. Die kryte en ander hulpmiddels was daar om kreatiwiteit en aktiwiteit te bevorder, terwyl die kerse en ander liturgiese elemente weer stilte en luistervermoë aangemoedig het. Alhoewel die Bybel steeds die sentrale bron van die erediens is, was die preek meer interaktief van aard en was gesprek om die tafels ‘n kern aspek van die erediens. 

Die erediens sluit die lees van die Bybelteks met ‘n kort verduideliking van die konteks daarvan in. Die gedeelte spreek die kognitiewe behoefte van sekere mense om kennis op te doen, aan. Daarna word mense se ervaring en leefwêreld betrek deur die oop vrae wat gevra word en om die tafels bespreek word.  Die skeppende aktiwiteite wat hierop volg, moedig interaksie en samewerking aan en word gekoppel aan die praktiese toepassing van die tema of teksgedeelte. Die erediens word afgesluit met ‘n gebedsoefening en musiek om mense te help om stil te word en met God te gesels.

Hierdie nuwe benadering tot die erediens bring mense van alle ouderdomme en agtergronde bymekaar in hierdie gemeenskap en stel hulle in staat om op hul eie, unieke manier God te ervaar. Die erediens is ‘n multidimensionele en multisensoriese ervaring wat elke persoon op verskillende maniere aanraak. Mense ervaar dat dit ‘n baie meer inklusiewe benadering is wat die diversiteit van mense se persoonlikhede en voorkeure in ag neem. Vir jongmense is dit belangrik dat elkeen se unieke spirituele style erken en geakkommodeer word, eerder as om een benadering te volg. Kryte en Kerse het gevolglik ‘n vaste instelling geraak in dié gemeente en ook mense getrek wat nie in die tradisionele erediens tuisgekom het nie. 

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).

‘n Predikant van ‘n plattelandse gemeente het ‘n droom gehad dat die hele dorp saam sou eet en kuier by ‘n lang tafel in die hoofstraat van die dorp. Hierdie droom is geïnspireer deur Bybelverhale oor gemeenskaplike etes. Die predikant in die gemeente het die visie met die gemeente gedeel, maar sy het gemeen daar is te veel struikelblokke om só ‘n reuse projek aan te pak. Tot haar verbasing was daar egter heelwat jonger mense wat daarvoor kans gesien het. Hulle het geglo in die droom en die energie gehad om dit te maak werk. Die predikant vertel hoe sy die beheer weggegee het en dat sy verras is hoe daar verskeie netwerke in die gemeenskap gemobiliseer is om die projek aan te pak. Talle mense het uit onverwagse oorde na vore getree om leiding te neem van die verskillende aspekte van die projek om die droom te help realiseer.

Uiteindelik het die aand aangebreek waaraan die hele gemeenskap saamgewerk het. ‘n Duisend mense, jonk en oud, ryk en arm het by een lang tafel in die hoofstraat aangesit om ‘n drie-gang maaltyd te geniet. Die aandete kaartjies is vir slegs R20 verkoop en vreemdelinge is ook genooi om deel te wees van die geleentheid om diversiteit te bevorder. Dit was ‘n ongelooflike ervaring om van deel te wees.

Die sukses van die langtafelprojek was te danke aan die diverse leierskapstyle, deelname en vertroue van die gemeenskap wat saamgewerk het aan ‘n gedeelde droom. Die predikant se aanvanklike visie is deur ander jonger leiers en spanne mense se dienswerk moontlik gemaak. Dit het die hele gemeenskap op ‘n tasbare manier nader aan mekaar gebring op ‘n aand wat niemand gou sal vergeet nie.

Die samewerking het ‘n sterk gemeenskapsgevoel geskep wat elkeen oortuig het dat groot drome verwesenlik kan word. Die langtafelprojek was ‘n voorbeeld van hoe netwerke uit die gemeenskap vir toekomstige projekte kan saamwerk en het hulle geïnspireer om verder te droom.  

Hierdie is ‘n uittreksel uit die boek “Ontmoet die Toekoms: 12 Rigtingwysers oor Jong Volwassenes, die Kerk en Spiritualiteit”, deur Anriëtte de Ridder, Francois Maritz en Stephan Naudé. Beskikbaar by DinkJeug (e-pos jeug@kaapkerk.co.za om die boek te bestel).